各位讀者，交代一下本書進度比大家聽。
其實本書我係2月尾公開比大家預訂，預訂即係話當時本書係尚未完成，我預計利用3月份去製作同完成本書，之後大約4月中就可以印刷成功再寄比大家，呢個係當時我計劃嘅時間表。
而我當時都不斷強調本書係未印起，係預訂....同預計4月有。
但可能大家睇唔到係預訂，以為我有現貨而無寄到，所以由預訂開始就已經轟炸我Email、inbox同Whatsapp，不斷問我幾時寄出本書，基本上，每日朝早到凌晨我仍然收到超過50個查詢...
開頭我都能夠用時間覆返大家，解釋返其實我無現貨，亦只係預訂，所以3月份係唔會收到書同寄出，亦希望能夠順利4月比到書大家。
但後來實在太多人唔知道而查詢，我一個人實在覆唔到過百人嘅提問，所以決定再一次交代返，但我本身諗咗好耐要唔要出Post交代，因為感覺上好似話緊一班讀者咁，我就唔想咁。但如果我唔公開交代一次，我只會一直令到大家日日罵我討厭我，我實在無奈忍痛咁交代一下，但希望大家唔好因為咁而怪邊個或引起罵戰。
本書其實已經寫好，但當我搵印刷公司時間，由於我訂嘅紙缺緊貨，原因大概係無貨櫃同缺紙，所以訂完係需要時間運嚟，呢一樣係我自己預計唔到，我對唔住大家，但我唔會轉印刷公司，始終呢間係最黃，我寧願等，係呢段等嘅期間，我就再繼續執一執本書。
過去3月份係我最辛苦日子，一來生活同工作壓力，二來我又要趕本書製作
我知道大家心急，所以我從來唔會怪大家
只怪我自己交代得唔好同高估自己能力可以生活同創作並存
整整成個三月份
我收到大量讀者罵我、話我呃錢，用粗口罵我，話我潛水走佬，話我偽黃...
我真係感到唔開心同失望
原來喺你地心目中，我孔明係呢啲咁嘅人......
我最近知大家想要返《失蹤》收藏完夢
我都自己拎錢出嚟買返版權同自資印刷返，諗住比大家真係完夢
成本係我一人比同好貴，我都堅持，因為我知大家都鐘意失蹤個故事
而預訂都係我第一次，因為所有錢都係我出
始終上一次本書已經失預算....所以我先預返個人數，幾多人訂就印幾多
我從來都無逃避過大家搵我
至少大家whatsapp搵我，我次次都覆返大家交代
只係inbox同email實在過百，我每日盡清都清唔哂
而本書嘅訂完嘅紙送到嚟同開機印刷到送貨
再由我包裝寄比大家
可能要五月內完成
我保證大家到時一定收到書
我亦會通知大家幾時會寄出
另外，大家唔洗怕我收唔到大家嘅單
只要上傳左入數紙，系統無取消你張單，基本上我睇到就可以
如果系統真係取消左，你就Whatsapp返我，我跟進返你情況
而今次預訂事件
我得到呢個教訓，令我明白到生活同寫作真係唔可以並存
因為咁，我攪到自己有焦慮情緒
我會好好反思一下自己仲有幾多心力去創作寫故事比大家
可能完成埋今次本書同出埋《失蹤》比大家買之後
我可能就從此收筆唔再寫故事了
再一次向大家說聲對唔住
Search